Халыкка ял итүе күңелле дә, файдалы да булачак

Яңартылган клубта яхшы шартлар булдырылган.

Барлык район халкы өчен Бала-Чытырманда күпфункцияле авыл мәдәният йортын ачу әһәмиятле, көтеп алынган һәм шатлыклы вакыйга булды. Хәзер монда бер түбә астында авылның клуб берләшмәләре, модельле китапханә, музыка мәктәбе, тренажер залы эшләячәк, ә бу инде төрле чаралар үткәрү һәм халык рәхәтләнеп ял итсен өчен бар шартлар да булдырылган дигән сүз.

Моның өчен зур тырышлык салынды һәм байтак эшләр башкарылды: капиталь ремонт ясалды, оештыру техникасы, спорт тренажерлары, демонстрацион һәм тавыш җиһазлары сатып алынды, интерьер яңартылды, тамашачылар креслолары, офис һәм китапханә өчен җиһазлар сатып алынды, профессиональ яктырту-техник җиһаз урнаштырылды, сәхнә өчен киемнәр һәм “Замандаш” башкорт халык фольклор ансамбле, “Карамелька” балалар бию коллективы өчен чагу костюмнар тегелде. Болар барысы да республика бюджеты акчасы исәбенә БР Мәдәният министрлыгы, БР Экология һәм табигатьтән файдалану министрлыгы, хакимият, мәдәният бүлеге һәм район мәдәният йорты ярдәме белән башкарылды.

Килгән кунаклар өчен яңартылган бина буенча экскурсия үткәрелде, ә фойеда Бала-Чытырман, Яңа Явыш, Сәет һәм Иске Чытырман авыллары осталарының кул эшләре күргәзмәсе тәкъдим ителде.

Балачытырманлылар шатлыгын бәйрәмгә килгән БР Мәдәният министры Әминә Ивниевна Шәфыйкова уртаклашты. Ул республика буенча илле алтынчы күпфункцияле авыл клубы булдыруның халыкка күппрофильле характердагы югары сыйфатлы хезмәтләр күрсәтү мөмкинлеге булачагын, төрле яшьтәге халык ихтыяҗлары канәгатьләндереләчәген билгеләде.

Тантанага җыелучыларны Федоровка районы МР хакимияте башлыгы Венер Фәрит улы Насретдинов котлады. Мәдәният йортын тергезү буенча мәдәният бүлегенең зур эш башкаруы турында мәдәният бүлеге начальнигы Булат Нурулла улы Сираҗетдинов сөйләде. Авыл клубы тормышы турында кунакларга Бала-Чытырман авыл советы авыл биләмәсе башлыгы Нигъмәтуллин Гадел Корбангали улы һәм авыл мәдәният йорты мөдире Кривоконь Анна Александровна бәян итте. Җыелучыларны Бала-Чытырман мәдәният йортында күп еллар хезмәт салган хезмәт ветераны Абрамова Сәрә Хәйдәр кызы котлады. Күпфункцияле мәдәният йортын ачу тантанасын “Замандаш” башкорт халык фольклор ансамбле, район мәдәният йортының “Околица” вокаль ансамбле, солистлар - Зөфәр Атангулов (Иске Чытырманнан), Гүзәл Сәлишева, Ирина Захарова, Айнур Сөбхангулов (барысы да Бала-Чытырманнан), “У прясла” вокаль ансамбле чагу чыгышлары белән бизәде.

Күпфункцияле клубны ачу халыкны мәдәни иҗат процессына җәлеп итәргә, һәр кешегә теләкләрен тормышка ашырырга, иҗади мөмкинлекләрен ачарга ярдәм итәчәгенә һәм көндәлек проблемалардан ял итәргә мөмкинлек бирәчәгенә шик юк.