Кечкенә артистлар тамаша күрсәттеләр

Билгеле булуынча, 2019 ел Русиядә һәм республикала Театр елы дип игълан ителде. Бу турыда хәтта иң кечкенәләребез – балалар бакчасы тәрбияләнүчеләре дә белә.Шулай, 11 апрельдә Динес авылының “Ләйсән” балалар бакчасында балалар һәм тәрбиячеләр катнашлыгында “Яшел алан” театральләштерелгән тамашасы күрсәтелде. Чарага кечкенәләр мәктәп укучыларын, укытучыларны, әти-әниләрен, дәү әти-дәү әниләрен чакырган. Шундый зур аудитория алдында балалар рольләрен аеруча тырышып уйнады. Чагу костюмнарны балаларга әти-әниләре теккән, моның өчен аларга рәхмәт белдерделәр. Ә балалар тамашачыларның көчле алкышларын ишетеп куанды, чара азагында укучылар белән бергә күңелле уеннар уйнады.