Коткаручылар 83 яшьлек бабайны урманнан тапкан

16 сентябрьдә Авыргазы районының Төбәк авылында 83 яшьлек ир-ат югала.

Ул сарыклар көтүен көтә һәм өенә кайтмый. Бу хәл турында хәбәр ашыгыч хезмәтләргә 17 сентябрьдә килә. Пенсионерны эзләргә Башкортстанның Гадәттән тыш хәлләр буенча дәүләт комитетының авария-коткару хезмәте, полицейскийлар һәм авыл халкы чыга. Бераздан адашкан көтүчене урманда тапканнар.

Ир-ат сарыклар көтүен көткән вакытта хайваннар урманга кереп киткән. Бабай алар артыннан китә һәм адаша. Сарыклар авылга кайта, ә менә көтүчене эзләп алып кайтырга туры килгән,- дип яза "Кызыл таң" гәзите.

Фото: "Башинформ" сайтыннан.