Мәчет, клуб территорияләрен, чишмәләрне төзекләндерделәр

Балыклыбаш авылында халык яраткан “Саумысыз, авылдашлар!” бәйрәменә әзерлек бара. Ай башында клуб һәм мәчет территорияләрендә өмә үткәргән иделәр: чүп җыйдылар, чүп үләннәрен чаптылар, чәчәк түтәлләрен матурладылар. Бу изге эшне авыл клубы мөдире Нурия Тимербулатова оештырды. Ә берничә көн элек чишмәләр территорияләрен төзекләндерү буенча өмә үткәрделәр. “Вильдан чишмәсе” биләмәсен балалары белән Вильдан хәзрәт Исмәгыйлев төзекләндерде. Ә “Җәмилә” чишмәсендә өмәне Фәйрүз Мөрсәлимов белән Сәбилә Шәрипова оештырды. Чүптән тазартырга, коены, өстәл-скамьяларны буярга аларга Елга урамы халкы ярдәм итте. Бәйрәмне тагы да ямьлерәк итәргә тырышкан бу авылның актив кешеләренә тазалык, тәртип һәм матурлык өчен тик рәхмәт кенә әйтәсе кала.